ivanliresearch
patreon
一個圖話你知點解投資要長線。成日講「港股呢？」—咁港股係普遍例子，定個別例子？仲有，分散而減低啲回報，一般好過唔分散而輸趴街。
🕑 Added 2023-12-12 05:53:07 +0000 UTC美國通脹數字，聯儲局議息，睇啲乜？
但根本大方向已定，長期投資者唔使點理。但你睇幾日嘅當然冇得分析
預告：信報文講港股死因
下篇預告：日本經濟同股市
美股有冇試過坐足十年輸錢？有！咁可以點？「再坐耐啲」
你今年回報有冇40%？我冇。你冇都正常。咁唔好異想天開話捉位
年頭buy and hold納指已經係「正路」嘅 call，都咁難。何況不時不食？
港股係普遍例子，定個別例子先？咁都分唔到？
不停要同人講「港股呢？」「港股呢？」—同我過唔去，定同自己過唔去？
「早知100%美股，使乜分散」—咁你唔100%納指？唔100% NVDA？
分散拖低少少回報嘅痛苦，肯定好過集中但輸趴街
分散投資真係好東西，唔止實質回報，仲防止你判斷錯
有關長線投資：點解係「港股呢？—你唔拎美股做例？邊個有代表性？
「人生有幾多個十年？「in the long run we are all dead」—其實表達乜？
你day trade，就同賭大細冇乜分別。但長玩，兩者分別就爭好遠
我係廢柴，就一定打一分過。我係世界冠軍，就同你打21分
美國通脹數字，聯儲局議息，睇啲乜？
1. 星期二晚會有美國通脹數字出，星期三晚就議息。呢度不講太多，照計亦唔會有好大嘅意外，不過提定你咁解。另外，因為又到一年四次嘅「大會」，所以又會有聯儲局嘅經濟預測之類，但可能唔在呢度寫，可能Facebook貼算，費事打斷咗成個系列。
但根本大方向已定，長期投資者唔使點理。但你睇幾日嘅當然冇得分析
2. 無論如何，大前題係而家已經「炒緊」甚至「炒咗」減息。咁如果啲通脹數字高過預期，或者聯儲局啲指引話冇咁快減息，市場回調並不出奇。事實上聯儲局近排又放風話「唔好估咁早減息呀」。事實上市場成日都會回調，上篇講咗。受唔到嘅，咁你永世贏唔到大錢。因為股票嘅回報就係嚟自你肯受風險。
3. 無論如何，即使呢兩日市場回調，都只係噪音。記住去睇「大圖畫」—狼就真係嚟，下年3月減息同9月先減，其實分別有幾大？根本今年全年都係呢個主題，只係你唔知點解去到年頭升一浸，然後又悶一輪。然後到11月又忽然間抽多9%。好難捉。但大趨勢（通脹回落，加完息）極之易睇，係咪？一般人都睇到。
4. 但對於睇一兩個月甚至幾日嘅人，自然會畀呢啲消息舞到頭暈轉向 — 又一個支持「長期投資」嘅理由。因為你短期嘅，根本冇得點分析，只係靠估，機率遊戲。啲人嘅「分析」，同睇百家樂盤路差不多，只係對住隨機事件以為睇到規律。
預告：信報文講港股死因
5. 另外我寫咗篇信報文，講港股，「死因研究」。長長地，但夠淺白，唔明解到明。唔明港股點解咁差嘅，可以睇下。又或者，上面個表已經解咗大半。盈利跌咗兩成幾，再加埋種種原因估值收縮。恒指高位跌一半，可能跌過籠，但唔係完全冇原因 — 但真係同「經濟」關係唔係好，特別同香港經濟冇乜關係。
下篇預告：日本經濟同股市
6. 今篇寫短啲，因為下篇會係好有趣嘅嘢：講日本經濟，日本股市。你覺得日本經濟真係好？點解你覺得好？咩叫經濟？好多遊客就經濟好？日本一向都多遊客架啦，個incremental effect有幾多？
7. 講返上篇文，今年美股極之易賺。唔好因為港股唔掂，就覺得「唔應該長期投資」。但當然美股都試過「迷失十年」（誇大咗，之後寫）。咁可以點？當然係分散。
美股有冇試過坐足十年輸錢？有！咁可以點？「再坐耐啲」
8. 況且，係冇包生仔的。美股係好少坐五年十年都輸錢。但有冇試過？有！百年一遇嘛。咁可以點？「咪再坐耐啲」！事實上，「迷失十年」後，就係極豐收嘅十年。仲有，咪唔好只係一注獨贏，你時機分散，咪唔會在十年嘅高位飛晒入去。
9. 當然好多人嘅妙想天開就係：咁2000-2010年我買新興市場，2010年-2023年買美股，然後又搵個位轉其他嘢，咪得 — 但again，有咁易？重覆一次：你覺得2000-2010年買美股嘅人，全部都係傻仔？
你今年回報有冇40%？我冇。你冇都正常。咁唔好異想天開話捉位
10. 根本好簡單一句：你今年投資回報，有冇40%？「其實唔難」，納指今年都升40%啦！由頭坐到尾咋，甚至唔使你低位撈。咁但有幾多人有40%回報？咁肯定有人有，「你早兩晚100蚊買法蘭克福60000%回報添，都唔使年度化」—但be realistic，今年絶大多數人都唔會有40%回報啦？我都當然冇。你冇都好正常，有亦可能只係好彩。
11. 想講嘅係：年頭all in 納指，已經係一個相當「正路」，係有一定機會做到嘅東西。當然多數人唔會，但我估有人做到。但即使一個咁「正路」嘅做法，都好多人做唔到 — 更何況你嗰啲玩雜技，「不時不食」，2000-2010年買新興市場，2010年後買科技股
年頭buy and hold納指已經係「正路」嘅 call，都咁難。何況不時不食？
12. 再講一次，畢菲特都係20%回報多啲，已經係股神 — 你每年「只要」捉到恒指高位位，每年都至少35%回報 — 咁但，股神都做唔到啦。
13. 我就真係好怕啲人事後拎住個圖，然後同你講：拿，你教人2000年沽晒美股買晒新興市場，2010年沽晒新興市場轉投美股，咪得 — 其實我教你買場波應該易啲。
14. 講返，上一篇文嘅例子，係講咗「Wework爆煲唔等於其他股票都爆煲」，指出咗啲人用個別例子去做證據嘅謬誤。
港股係普遍例子，定個別例子先？咁都分唔到？
15. 咁你講到港股，根本一樣。一句，港股係普遍例子，定特例？你唔知嘅，又可以印呢個表出嚟掟飛鏢（畀埋個Excel你印）。又或者，你睇下MSCI World．
16. 咁你拎「港股長坐都輸」嚟話「長線一樣輸」，咪好似你拎WeWork破產嚟同人講「買股票都係會total loss」囉。根本只係home bias，謙虛啲，你香港幾百萬人啫。美股歐洲股幾多人買？你拎自己個世界當係全宇宙？亂買一個市場都10%啦 — 全部都係你輕易買到嘅市場，我唔係叫你去委內瑞拉開個戶口。
17. 咁好多人只買港股，我一路都極反對。佢地以為自己「熟」港股，以為「唔熟」美股，根本miss the whole point．我使唔使識砌ChatGPT先可以買 Nvidia？
不停要同人講「港股呢？」「港股呢？」—同我過唔去，定同自己過唔去？
18. 根本一句已經講完：今年絶大多數股市，都有相當唔錯嘅升幅。過去五年，十年都係。硬係只係要同我講「港股」嘅— 唔知係同我過唔去，定同自己過唔去。咁一係就你只買港股，就當然係你嘅問題。一係其實你都唔係只買港股（咁咪好囉！），但你上得太多網，睇得太多人講，一樣有害身心健康
「早知100%美股，使乜分散」—咁你唔100%納指？唔100% NVDA？
19. 而況且，我從來冇叫你只買港股丫。肯定呢個Patreon寫咗4年都冇一日叫你「只買港股」。正係因為「買一個市場」會出現呢種問題，所以先叫你分散。咁你又會拗「咁但分散咪拖低回報囉」—咁咪返返去上個系列講risk and reward嘅問題囉 —你應該take幾多risk？
20. 但根本有眼你睇，你見啲咩人鬧得最多？就係買晒港股嘅人。而比較少見有分散嘅人會鬧「早知100%美股啦畀啲港股拖低回報」— 會有咁嘅人，我都覺得「早知就100%美股」。但你都知，咁樣係無止境嘅。「早知100%納指」「早知100% Nvidia」 - 請大家唔好射完槍先畫靶，be realistic
21. 你見好多人嘅呢啲質疑，爭拗，都真係浪費人生嘅。你自己買過咪知。所以真係投資要趁早，真的。我唯一後悔就係太遲買股票 — 當然除咗係經驗寶貴，亦係 time is your friend
分散拖低少少回報嘅痛苦，肯定好過集中但輸趴街
22. 而十分明顯地，上面嘅例子畀你見到，「有分散拖低少少回報」，一般好過「冇分散」而輸大錢。呢啲亦係以前講過嘅嘢，因為一般輸錢嘅痛苦大過贏錢嘅快樂 — 特別係，美股大升，但港股跌。你只買港股嘅，仲要日日聽埃汾講「今年賺錢易過借火」—我包你心理不平衡。唔止，仲會影響埋你嘅判斷，甚至覺得股市係騙局（之前都有讀者話股市係Ponzi Scheme呀） — 就係因為你用「港股」去推論全世界。
分散投資真係好東西，唔止實質回報，仲防止你判斷錯
23. 所以分散投資真係好東西，唔止實質回報，仲防止你判斷錯。唔好學壞手勢，唔好因為個別經驗影響你判斷世界（雖然好難） — 正如你第一次遇人不淑，唔等於成個世界啲男人都係賤人（當然不停遇人不淑，就檢討下）。正如你第一次賭錢贏，唔等於賭錢就好 —我真係以為呢啲係常識。但你睇幾多人同你講「港股呢？
有關長線投資：點解係「港股呢？—你唔拎美股做例？邊個有代表性？
24. 然後關於長期投資，呢幾年當然好多人質疑，就係拎港股做例子。但佢地唔會拎美股做例，非常好笑。我同你講美股喎，最大最具代表性嘅股市，唔係阿根廷。咁你諗下，邊個例子有代表性啲？
25. 仲有一句，我好怕聽到，但呢排唔止一個讀者同我講：「等十年？人生有幾多個十年」。仲有一個變種「in the long run we are all dead」—sound so smart，但其實想表達乜？你問我，投資就一定係長線。唔一定係十年，但點都係以年做單位，三五七年起碼。你覺得唔係嘅，咁其實你根本唔係投資。因為既然大家都知投資有風險，有好多變數，有運氣成份 — 咁短期，就真係只講運氣。
「人生有幾多個十年？「in the long run we are all dead」—其實表達乜？
26. 以前貼，唔想再重覆太多。但睇圖，
即使強如美股，你每日賭，見到正回報嘅機會，都係50%多少少。反之，你去買大細，一舖贏錢嘅機會，略低過50%。
27. 咁即係，你只係賭一舖嘅，兩者真係分別不大。之但係，你玩100舖，1000舖，就睇到個分野。買股票有正回報，而賭錢一定輸死。
你day trade，就同賭大細冇乜分別。但長玩，兩者分別就爭好遠
28. 原因正係「甚麼是投資」系列講嘅：股市創造價值，係positive sum game（而我唔知幾多人有睇）。正係因為咁，所以賭錢一定要快。以前做過個思想實驗：如果一定要你賭晒100萬嘅（當唔畀你兩邊買啦），你就一舖買晒落去，咁你有48%機會贏錢走人。你分開10000舖每舖100嘅，必輸無疑（你可以試下，我同你賭幾多都得）。
29. 但投資正好相反，因為positive sum，所以，你應該利用時間優勢！咁所以投資梗係長線啦！
我係廢柴，就一定打一分過。我係世界冠軍，就同你打21分
30. 仲係唔明？換個角度講，亦係以前常用嘅比喻。兩個人打乒乓波，一個係普通球手，一個係世界冠軍。如果你係普通球手嘅，咁梗係提議打一分過啦！分分鐘我枱角滴死你，或者有個瀨網波就搞掂。但如果我係世界冠軍嘅，梗係打11分甚至21分。我食硬你，唔會揀打1分咁低能。我唔會同人講「人生有幾多個21分」，除非趕住收工（所以80歲就唔好100%股票）
31. 覺得唔應該長線嘅人，你咪等於明明有優勢唔用，明明實力高過人但要同人打一分。咁你輸波，當然係咎由自取。
32. 一句到尾：你係廢柴，定世界冠軍？買股票係positive sum game，定入賭場？ — 所以點解咁煩氣。因為好多人嘅基本認知都係有問題。佢地真係以為股票同賭場一樣。但，49%同53%嘅分別，拖長就好大分別！
Comments
一舖買晒落去（當唔畀你兩邊買啦），咁我有49%機會贏錢走人，但我有51%輸晒。 分開10000舖每舖100嘅，必輸無疑，但會較為貼近期望值，即係輸兩萬幾。 咁我寧願分開10000舖賭。
